पोखरा, २८ पुस / पोखरा क्रिकेट क्लबले अन्तर क्लब पीसीसी क्रिकेट कप २०७४ आयोजना गर्ने भएको छ ।

२३ वर्ष अगाडि स्थापित पुरानो उक्त क्लबले आगामी माघ अन्तिम साता स्थानीय स्तरको अन्तर क्लब प्रतियोगिता आयोजना गर्ने अध्यक्ष निकेश श्रेष्ठले जानकारी दिएका छन् ।

पोखराको क्रिकेट विकासमा निरन्तर योगदान दिँदै आएको उक्त क्लब पछिल्लो समय सक्रिय नबनिरहेको गुनासो बढिरहँदा युवा टोलीको नेतृत्वले पुनः आफ्नो शाख जोगाउने ढंगले गतिविधि अघि बढाउने श्रेष्ठले जनाए ।

माघ २३ गतेदेखि २७ गतेसम्म पाँच दिन सञ्चालन हुने प्रतियोगितामा कास्कीका बढीमा आठ टीम सहभागी गराउने प्रतियोगिता संयोजक समेत रहेका क्लबका उपाध्यक्ष उत्सव शाक्यले जानकारी दिए ।

प्रतियोगितामा विजेता र उपविजेतालाई नगद, शिल्ड तथा प्रमाणपत्र प्रदान गरिनुका साथै म्यान अफ दि टुर्नामेन्ट, बेस्ट बलर, बेस्ट ब्याट्सम्यान र हरेक दिन म्यान अफ दि म्याचलाई समेत पुरस्कृत गरिने उनले बताए ।

स्थानीय खेलाडीहरुको प्रतिभा प्रस्फुटनका साथै भविष्यमा उत्कृष्ट खेलाडी उत्पादन गर्ने लक्ष्यका साथ प्रतियोगितालाई आगामी दिनमा समेत निरन्तरता दिईने शाक्यले बताए । उनका अनुसार प्रतियोगिताको तयारी तिब्रताका साथ अघि बढिरहेको छ ।

क्लबले उपाध्यक्ष शाक्यको संयोजकत्वमा प्रशिक्षक समेत रहेका रिजन प्रजु, प्रदीप रावत, गोविन्द प्रधान, चन्द्रबहादुर गुरुङ सदस्य रहेको आयोजक समिति गठन पनि गरेको छ । पोखरा क्रिकेट क्लब २०५१ मा स्थापित पुरानो क्लब हो ।

२०६० मा धरानमा सम्पन्न दर्शन स्मृति क्रिकेट प्रतियोगिताको उपाधि पिसिसी क्लबले नै जितेको थियो । त्यसपछि भने क्लब सक्रिय बन्न सकेन । अब युवाहरु जागरुकताका साथ लागिपरेकाले सहयोगको अपेक्षा समेत उनीहरुले गरेका छन् ।