नेपालले एसिसी यु-१९ प्रिमियर कपको उपाधि चुमेको छ । मलेसियाको बायोमास ओभलमा भएको खेलमा यूएईलाई डकवर्थ लेविस नियमका आधारमा १९ रनले पराजित गर्दै नेपालले कप जितेको हो।

टस जितेर पहिले ब्याटिङमा उत्रिएको नेपालले निर्धारित ५० ओभरमा आठ विकेटको क्षतिमा दुई सय ८० रन बनाउन सफल भयो । जवाफी ब्याटिङमा मैदानमा आएको यूएईले ११ ओभरमा दुई विकेटको क्षतिमा ५० रन बनाएको थियो । त्यसै क्रममा पानी परेपछि खेल रोकिएको थियो।

यूएईले २७ ओभरमा एक सय ९८ रनको लक्ष्य प्राप्त गरेको थियो। तर यूएई २६ दशमलव पाँच ओभर एक सय ७८ रन बनाउँदा अलआउट भयो। नेपालका लागि देव खनालले सर्वाधिक एक सय रनको महत्वपूर्ण योगदान दिएका छन् । उनले ९२ बल खेल्दै ९ चौका र ३ छक्का प्रहार गरे।

एसिसी यु–१९ विजेता नेपाली खेलाडीलाई प्रधानमन्त्रीको बधाई

प्रधानमन्त्री पुष्पकमल दाहालले एसिसी यु–१९ प्रिमियर कपका विजेता खेलाडीलाई बधाई दिएका छन् । खेलाडीको उत्कृष्ट प्रदर्शनप्रति धन्यवाद दिँदै उनले नेपाली क्रिकेट टोलीले गर्विलो उपाधि जित्न सकेको भनेर सामाजिक सञ्जालमा बधाई लेखेका छन् ।

मलेसियाको क्वालालाम्पुरमा भएको एसिसी प्रिमियर कपको अन्तिम प्रतिस्पर्धामा नेपाली खेलाडीले युएईलाई पराजित गरेको थियो ।