युद्धग्रस्त इजरायलमा रहेका २ सय ५३ नेपाली नागरिकको उद्धार गरी नेपाल एयरलाइन्सको विमान देशतर्फ उडेको छ । अध्ययनका लागि त्यहाँ पुगेका विद्यार्थी सहित परराष्ट्रमन्त्री एनपी साउद लगायत सरकारी अधिकारी सवार विमान नेपाल उडेको हो ।

उद्धारका लागि बिहीबार बिहान दुबई हुँदै गएको नेपाल एयरलाइन्सको विमान तेलअभिभस्थित बेन गुरियन अन्तर्राष्ट्रिय विमानस्थलमा अवतरण गरेको थियो । नेपाली राजदूतावासका अनुसार युद्धग्रस्त क्षेत्रबाट उद्धार गरी विभिन्न सेल्टरमा राखिएका नेपालीहरु नेपाल फर्काइएको हो । स्वदेश फिर्ता हुने टोलीमा हमासको आक्रमणमा ज्यान जोगाउन सफल वीरेन्द्र चौधरी, प्रमोद केसी र धनबहादुर चौधरी समेत नेपाल फर्किँदै छन् ।

आक्रमणमा परेका विपिन जोशी अझै बेपत्ता छन् । १७ जनाको समूहमा भएको आक्रमणमा परी १० जना नेपालीको मृत्यु भएको थियो । शव ल्याउने प्रक्रिया जारी रहेको परराष्ट्र मन्त्रालयले जानकारी दिएको छ ।