आइसीसी विश्वकप क्रिकेट अन्तर्गत अफगानिस्तानविरुद्ध भारतले कीर्तिमानी जित निकालेको छ । भारतले अफगानिस्तानलाई आठ विकेटले हराउँदै, कप्तान रोहित शर्माले कीर्तिमान कायम गर्न सफल भएका छन् ।

दिल्लीस्थित अरुण जेट्ली रंगशालामा अफगानिस्तानले टस जितेर पहिला ब्याटिङ गरेको थियो । उसले ५० ओभरमा आठ विकेट गुमाएर दुई सय ७२ रन बनाउन सफल भयो । यता भारतले दुई सय ७३ रनको विजयी लक्ष्य दुई विकेट गुमाउँदै ३५ ओभरमा पूरा गरेको छ ।

यस्तै आजको खेलमा भारतका कप्तान रोहित शर्माले कीर्तिमानी ब्याटिङ गर्न सफल भएका छन् । शर्माले ८४ बलमा १६ चौका र ५ छक्कासहित सर्वाधिक एक सय ३१ रन बनाएका छन् । विश्वकपमा शर्माको यो सातौं शतक हो। अब शर्मा विश्वकपमा सर्वाधिक शतक प्रहार गर्ने खेलाडी बनेका छन्। यसअघि विश्वकपमा भारतका पूर्वकप्तान सचिन तेन्दुलकरले ६ तथा श्रीलङकाका पूर्वकप्तान कुमार सङ्गाकारा र रिक्की पोन्टिङले पाँच पाँच शतक प्रहार गरेका थिए।