नेपाली कांग्रेसका नेता शेखर कोइरालाले बैंकहरू मिटरब्याजी सरह भएको प्रतिकृया दिएका छन् । कांग्रेस नेता कोइरालाले कानुन अनुसार राष्ट्र बैंकले नियमन गर्ने व्यवस्था भए पनि बैंकहरुको ब्याजका कारण देशमा व्यवसायीहरु त्रसित भएको बताएका छन् ।

नेता कोइरालाले अहिले बैंकको ब्याजकै कारण व्यवसायीहरु आजित हुनुपर्ने अवस्था आएको र बैंकहरुले मिटर ब्याजीकै सरहमा व्यवहार गरिरहेको आरोप लगाए । नेता कोइरालाले मिटब्याजीलाई कारबाही गर्न कानुन बनाएर कारबाही गर्न सुरु गरिएको भएपनि देशको आर्थिक संकटलाई हेर्दा बैंकहरुको ब्यवहार संकट टार्नमा केन्द्रित नभई संकट निम्त्याउन तर्फ उद्धत रहेको बताए । बजारमा मन्दी छाएको बेला बैंकले व्यवसायीबाट १३ प्रतिशत ब्याजदर लिईरहेको उदाहरण दिँदै उनले बैंकहरुलाई सोच्न आग्रह गरेका छन् ।

देशको आर्थिक अवस्था नाजुक बन्दै गएको र देश रेमिट्यान्सबाट चल्नुपर्ने अवस्थामा रहेको बताए । उनले अहिले रेमिट्यान्स आयो भनेर सबै खुसी भएपनि त्यसबाट देश झन् आर्थिक संकटमा फस्दै जाने प्रतिकृया दिए ।