काठमाडौ । सुन तस्करी प्रकरणमा संलग्न देखिएकाहरुलाई नेपाल प्रहरीको सीआईबीले सोधपुछ तथा अनुसन्धान जारी राखेको छ । केहीदिन अघि पूर्व सभामुख तथा माओवादी नेता कृष्णबहादुर महराका छोरा राहुल महरालाई अनुसन्धानका लागि सोधपुछ गरेको थियो ।

यसैक्रममा सुन तस्करी प्रकरणमा संलग्न गिरोहसँग सम्पर्क रहेको देखिएपछि सीआईबीले पूर्वउपराष्ट्रपति नन्दबहादुर पुनका छोरा दिपेश पुनसँग सोधपुछ गरेको छ । सुन तस्करीमा संलग्न भनिएका चिनिया मूलका बेल्जियन नागरिक दावा छिरिङसँग पूर्वउपराष्ट्रपति परिवारको सम्बन्ध रहेको सार्वजनिक रुपमा नै देखिएपछि प्रहरीले सोधपुछ गरेको हो ।

दावा छिरिङसँग दिपेशको व्यापारिक साझेदारी रहेको दाबी गरिन्छ । यसअघिनै सुन प्रकरणमा मुछिएका छिरिङ सहित चिनियाँ टोलिलाई लिएर दिपेश गोसाइँकुण्ड सम्मको हवाई यात्रामा गएको सार्वजनिक नै भईसकेको छ । सुन प्रकरणमा थुनामा रहेका पूर्व सभामुख महराका छोरा राहुल महरा, पूर्व उपराष्ट्रपतिका छोरा दिपेश र नेकपा एमालेका उपाध्यक्ष एवं पूर्वगृहमन्त्री रामबहादुर थापाका छोरा प्रतिक थापाका बीच व्यावसायिक साझेदारी सम्बन्ध रहेको बताइन्छ । बादलका छोरा प्रतिक नक्कली शरणार्थी प्रकरणमा मुछिएपछि, फरार छन्। प्रतिक थापा अहिले देश बाहिर रहेको प्रहरी उच्च श्रोतको दावी छ ।

राहुल महरा माओवादीको युवा संगठन वाइसिएलका उपमहासचिव हुन, भने दिपेश विद्यार्थी संगठन अनेरास्ववियु क्रान्तिकारीका महासचिव छन् । पूर्व सभामुख महराका छोरा राहुललाई गत बुधबार प्रहरीले उनकै निवास खुमलटारबाट प्रकाउ गरेको थियो। तर सामाजिक संजालमा भने सीआईबीलाई सघाउन आफै प्रहरी समक्ष पुगिएको दावी समेत गरिएको थियो । नक्कली शरणार्थी प्रकरणमा फरार रहेका प्रतिकको ६० किलो सुन भित्र्याउने समूहसँग निकट रहेको र यसअघि पनि तीनै नेतापुत्रहरूले गिरोहसँग मिलेर सुन भित्र्याएको तथ्य सिआइबीले फेला पारि सकेको छ ।