अमेरिका

संयुक्त राष्ट्रसंघका लागि न्यूयोर्कस्थित नेपालको स्थायी नियोग प्रमुखमा लोकबहादुर थापा नियुक्त भएका छन् । सरकारको सिफारिसमा राष्ट्रपति रामचन्द्र पौडेलले परराष्ट्र मन्त्रालयका सहसचिव थापालाई सोमबार नियोग प्रमुख तथा राजदूतमा नियुक्त गरेका हुन् ।

बेल्जियमका लागि नेपाली राजदूत भईसकेका थापा परराष्ट्र मन्त्रालयमा उत्तर पूर्वी एशिया महाशाखा हेर्दै आएका थिए । थापा ३४ बर्षदेखी परराष्ट्र सेवामा कार्यरत छन् । सरकारले थापा सहित जेनेभास्थित संयुक्त राष्ट्रसंघिय नियोगमा रामप्रसाद सुवेदी, संयुक्त अरब इमिरेट्सको राजदूतमा तेजबहादुर क्षेत्री, कुवेतको राजदूतमा घनश्याम लम्साल, थाइल्याण्डको राजदूतमा धनबहादुर ओली र फ्रान्सको राजदूतमा सुधिर भटट्राईको नाम सिफारिस गरेको थियो ।

यसअघि न्यूयोर्कस्थित नेपालको स्थायी नियोग प्रमुखमा अमृत राई कार्यरत थिए । लामो समय नेपालको स्थायी प्रमुख भएर राईले उत्कृष्ट कार्य गरेका थिए । यहाँ कार्यरत रहँदा राईले राम्रो काम गर्ने कर्मचारीको छवि समेत बनाएका थिए ।

सरकारले सिफारिस गरेका नामहरु गत साता संसदिय सुनुवाई समितिबाट अनुमोदन भएका थिए ।