पोखरा, २६ साउन । संयुक्त संघर्ष समितिको अगुवाइमा नेपाल टेलिकमका कर्मचारीहरु आन्दोलित भएका छन् ।

ट्रेड युनियन अधिकार रक्षा एवं संस्थागत विकास र सुशाशनका लागि आन्दोलनमा उत्रनु परेको कर्मचारीको भनाइ छ ।

कर्मचारी विनियमावली कर्मचारी मैत्री बनाउनुपर्ने, कर्मचारीहरुलाई समान र सम्मानजनक सामाजिक सुरक्षा एवं वृत्ति विकासको अवसर सृजना हुने गरी कर्मचारी विनियमावलीमा व्यवस्था गर्नुपर्ने माग कर्मचारीको छ ।

त्यस्तै, कर्मचारीहरुले कम्पनीको व्यवसायिकता एवं प्रतिस्पर्धी क्षमता अभिवृद्वि गरी आम्दानीमा भइरहेको गिरावट रोक्न र कम्पनीको वैज्ञानिक पुनसंरचना गर्न, सेवाग्राहीलाई सर्वसुलभ र भरपर्दाे सेवा उपलब्ध गराउन, आधिकारीक ट्रेड युनियनसँग गरिएका सम्झौता कार्यान्वयन गर्न पनि माग गरेका छन् ।

केन्द्रीय कार्यालयमा विगत २१ दिन र सात वटै प्रादेशिक कार्यालयमा भने विगत तीन दिनदेखि आन्दोलन जारी रहेको छ । आन्दोलित कर्मचारीहरुले टेलिकमको प्रादेशिक कार्यालय पोखरामा निर्देशकको कार्यकक्ष अघि एक घण्टा दिएका छन् ।

हातमा कालो पट्टि बाँधेर १० देखि ११ बजेसम्म धर्ना दिइएको हो । कर्मचारीहरुले कार्यालयको सेवामा भने कुनै अवरोध गरेका छैनन् ।