प्रहरीको प्रारम्भिक अनुसन्धानले अमेरिकाको ओहायो राज्यमा बस्दै आएका एक नेपालीभाषी भुटानी पुरुषले आफ्नी श्रीमति हत्या गरेको आरोप लागेको छ । गत हप्ता बुधवारदेखी बेपत्ता भनिएकी अमेरिकाको ओहायो राज्यमा बस्दै आएकी चन्द्रमाया पौडेल रिमालको स्थानिय समय अनुसार मंगलबार बिहान शव फेला परेको छ । प्रारम्भिक अनुसन्धानका आधारमा चन्द्रमायाको हत्या उनका पति जेम्स रिमालले गरेको हुन सक्ने भन्दै प्रहरीले रिमाललाई हत्या अभियोगमा पक्राउ गरेको छ ।

चन्द्रमाया र उनका पति जेम्स दुवैजना नेपालीभाषी भुटानी भएको र शरणार्थीका रुपमा अमेरिका आएको जनाइएको छ । प्रहरीले ३३ बर्षीय चन्द्रमाया पौडेल रिमालको शव मंगलबार बिहान स्थानिय मेट्रो पार्क फ्रिडम ट्रेल नजिकैको जंगलमा फेला परेको पुष्टि गरेको छ ।

चन्द्रमाया गत बुधबार बिहानदेखी बेपत्ता भएको भन्दै उनकै श्रीमान रिमालले प्रहरीमा रिर्पोट गरेका थिए । ३३ बर्षीय जेम्सले यसै महिनाको २१ तारिख बुधवार श्रीमति बेपत्ता भएको रिर्पोट प्रहरीलाई गरेका थिए । स्थानिय प्रहरीले चन्द्रमायाको शव जंगलमा फेला पारेपछि प्रारम्भिक अनुसन्धानका आधारमा उनका श्रीमान जेम्सलाई हत्या अभियोगमा पक्राउ गरेको हो । रिमालविरुद्ध हत्या गरेको, घाँटी थिचेको, प्रमाणसँग छेडछाड गरेको, घरेलु हिंसा गरेको, प्रहरीलाई झुठो विवरण दिएको र शवको दुरुपयोग गरेको लगायतका अभियोग लागेको छ ।

प्रहरी अधिकारीले चन्द्रमायाको मृत्यु बारे गहिरो अनुसन्धान गरिरहेको जानकारी दिएका छन् । अमेरिकामा रहेको नेपालीभाषी समुदाय चन्द्रमायाको हत्या श्रीमानबाट भएको हुन सक्ने प्रहरीको प्रारम्भिक अनुसन्धानपछि शोकमा छ ।

मृत फेला परेकी चन्द्रमाया पौडेल रिमाल