नेपाली समाज, टेक्ससको अध्यक्षमा पुनः राजेन्द्र वाग्ले निर्वाचित भएका छन् । शनिबार भएको निर्वाचनमा अत्यधिक मतका साथ उनी अध्यक्षमा निर्वाचित भएका हुन् ।

आइतबार बिहान प्रकाशित नतिजा अनुसार अध्यक्षमा विजयी वाग्लेले ८८५ मत पाएका छन् । उनका प्रतिद्वन्द्वी कमलराज सत्यालले ६११ मत पाए । २७४ मतान्तरले वाग्ले विजयी भए ।

नेपाली समाज टेक्ससमा दुई हजार पाँच सय १२ सदस्य आवद्ध छन् । शनिबारको निर्वाचनमा एक हजार पाँच सय ६४ जना मतदानमा सहभागी थिए ।

निर्वाचनबाट वरिष्ठ उपाध्यक्षमा जनक भण्डारी निर्वाचित भएका छन् । त्यस्तै, उपाध्यक्षमा बलराम पौडेल, महासचिवमा विजय भुसाल, सचिवमा पुण्य पाण्डे, कोषाध्यक्षमा रामकृष्ण यादव, सहकोषाध्यक्षमा गोविन्दराज जोशी निर्वाचित भए ।

युवा संयोजकमा प्रविश श्रेष्ठ, स्पोर्टस् संयोजकमा निलेश श्रेष्ठ निर्वाचित भए । यसअघिनै महिला उपाध्यक्षमा साबित्री भण्डारी र महिला संयोजकमा शान्ता कुमारी गिरी निर्विरोध भैसकेका छन् ।

कार्यसमितिका पाँच सदस्यहरुमा राधिका खराल, राधा अधिकारी पौडेल, रमेश अधिकारी, जीवलाल भुसाल र मनोज धिताल निर्वाचित भएका छन् ।

निर्वाचन सौहाद्रपूर्ण रुपमा सम्पन्न गराउन सहयोग गर्ने सबैप्रति निर्वाचन प्रमुख बैकुण्ठ बिक्रम थापाले धन्यवाद व्यक्त गरे । सन् १९९७ मा स्थापना भएको नेपाली समाज टेक्सस अमेरिकाका नेपालीहरुको पुरानो संस्थाहरु मध्यको एक हो ।