नेपाल सरकारले इजरायलको हमास आक्रमणबाट ज्यान गुमाएका नेपालीहरूको शव इजरायल सरकारको संरक्षणमा रहेको जानकारी गराएको छ । परराष्ट्र मन्त्रालयले पत्रकार सम्मेलन गरी दस जना नेपालीहरूको शव इजरायल सरकारको संरक्षणमा रहेको जानकारी दिएको छ । परराष्ट्र मन्त्रालयका प्रवक्ता सेवा लम्सालले इजरायल सरकारले हस्तान्तरण गरेलगत्तै नेपालीहरूको शव नेपाल ल्याएर परिवारको जिम्मा लगाइने जानकारी दिएकी छन् ।

प्रवक्ता लम्सालले भनिन्, इजरायलमा ज्यान गुमाएका नेपालीहरूको शव सरकारको संरक्षणमा छ। शव हस्तान्तरणपश्चात उच्च प्राथमिकता साथ नेपाल ल्याई परिवारलाई जिम्मा लगाउनेछौं । अज्ञात रहेका बिपिन जोशीको खोजीकार्य तीव्र पारिएको छ । इजरायल सरकारले उनको खोजीकार्यमा सघाइरहेको परराष्ट्र मन्त्रालयले जानकारी दिएको छ ।

मन्त्रालयका अनुसार, हालसम्म ३ सय ५० भन्दा बढीले इजरालयस्थित नेपाली दूतावासमा निवेदन दिएका छन् । त्यसमध्ये २ सय ८८ जना नेपाल फर्किन चाहेको छन्। नेपाल फर्किन चाहनेहरूका लागि नेपाल एयरलायन्सको विमान त्यसतर्फ जाने कार्यक्रम छ ।