सामाजिक संजाल फेसबुकमा अनर्गल प्रचार गर्ने एक जनालाई कास्की प्रहरीले पक्राउ गरेको छ । फेसबुक मार्फत भ्रम फैल्याउने स्याङजा आँधिखोला ५ बस्ने सुर्यबहादुर रेग्मीलाई प्रहरीले पक्राउ गरेको हो । रेग्मीले राष्ट्रिय स्वतन्त्र पार्टीका निवर्तमान सांसद डाक्टर ढाकाकुमार श्रेष्ठलाई निवास अगाडी धारिलो हतियार प्रयोग गरी घाईते बनाएको र उपचारका लागि मणिपाल शिक्षण अस्पताल लगिएको साथै सांसद श्रेष्ठको अवस्था चिन्ताजनक रहेको भनि फोटो सहित स्टाट्स पोष्ट गरेको प्रहरीको भनाई छ ।

प्रहरीका अनुसार समाजमा अराजकता फैल्याउने, आत्म सम्मान माथि आघात पुर्‍याउने र जीउ ज्यानको सुरक्षामा समेत असर गर्ने गरी रेग्मीले फेसबुक आइडी मार्फत भदौं २२ गते स्टाट्स लेखेका थिए । प्रहरीले रेग्मीलाई जाहेरीका आधारमा नियन्त्रणमा लिई विद्युतिय कारोबार ऐन, २०६३ विपरितको कसूर (साईबर अपराध) अन्तर्गत थप अनुसन्धान प्रकृया अगाडी बढाएको छ ।