काठमाण्डौं

गैरआवासीय नेपाली संघ अन्तर्राष्ट्रिय समन्वय परिषद्को आसन्न निर्वाचनमा गठबन्धन नहुने स्पष्ट संकेत देखिएको छ । नेपाली कांग्रेसले पार्टी निकट उम्मेवारहरुसँगको छलफलमा गठबन्धन नगरी निर्वाचनमा जान निर्देशन दिएको छ । यसो हुँदा नेपाली कांग्रेस निकटका उम्मेदवारहरु महेश श्रेष्ठ या डाक्टर केशव पौडेल मध्ये एकले टिकट पाउने छन् । केही समय पहिले दुवै उम्मेदवारले अध्यक्षमा उम्मेदवारी घोषणा गरिसकेका छन् । दुवै जना आकाक्षीहरु यति बेला टिकटका लागि काठमाण्डौंमा छन् ।

निकट श्रोत भन्छ, यि दुई मध्ये एकले टिकट पाउँछन् । गठबन्धन नगरी निर्वाचनमा जानेगरी पार्टी शिर्ष नेतृत्वले निर्देशन दिई सकेको छ, श्रोत भन्छ, नेपाली कांग्रेसबाट श्रेष्ठ या पौडेल मध्ये एक उम्मेदवार हुने पक्का छ । यसो त नेपाली कांग्रेस निकट रबिना थापाले पनि उम्मेदवारी घोषणा गरिसकेकी छन् ।

आईसीसीमा राष्ट्रिय राजनीतिको जस्तै गरी कम्यूनिष्ट धार र डेमोक्र्याटिक धारका उम्मेवारहरुका बीचमा गठबन्धन हुँदै आएको छ । अहिलेका तिन अध्यक्ष मध्ये रबिना थापा र कुल आचार्य कांग्रेस निकट मानिन्छन्, भने बद्रि केसी कम्यूनिष्ट निकट मानिन्छन् ।

कांग्रेसले टिकट दिँदा दुई आकाक्षीं मध्ये श्रेष्ठ बलिया उम्मेदवार मानिन्छन् । श्रेष्ठले पार्टी तहमा बसेर काम समेत गरेकाले उनि नेताहरुसँग नजिक छन् । यस्तै डाक्टर पौडेललाई पनि पार्टीमा राम्रै हैसियतमा राख्ने गरिएको छ । अध्यक्षका आकाक्षीं श्रेष्ठ हालका उपाध्यक्ष हुन भने डाक्टर पौडेल हालका महासचिव हुन् ।