काठमाण्डौं

नेकपा माओवादीले देशैभरी विशेष अभियान चलाउने भएको छ । नेकपा माओवादीको केन्द्रीय समिति बैठकले यस्तो निर्णय गरेको हो । केन्द्रीय समिति बैठकलाई सम्बोधन गर्दै माओवादी अध्यक्ष एवं प्रधानमन्त्री पुष्पकमल दाहालले अभियानका क्रममा देशभित्रका प्रत्येक घर परिवारलाई भेट्न र कुनै पनि घर नछाड्न केन्द्रीय सदस्यलाई निर्देशन समेत दिएका छन् ।

यस अभियानमा सात प्रदेशका सात वडामा अध्यक्ष दाहाल समेत पुग्ने माओवादीले जानकारी दिएको छ । अभियानमा पार्टीका सबै नेता तथा कार्यकर्ता कार्यक्षेत्रमा खटिनुपर्ने निर्देशन दिईएको छ । जनतासँग एकाकार भएको खण्डमा माओवादीले पुनः देशको पूर्ण नेतृत्व गर्ने निश्कर्ष सहित माओवादीले यस्तो अभियान संचालन गर्ने निर्णय भएको बताइन्छ ।

बैठक बारे जानकारी दिँदै पार्टी प्रवक्ता कृष्णबहादुर महराले केन्द्रीय समितिले विभिन्न २५ बुँदे समसामयिक प्रस्ताव पारित गरेको जानकारी दिएका छन् । महराले समाजवादी क्रान्तिको अभियान शुरू भएको उल्लेख गर्दै भनेले हामीले ‘जनतासँग माओवादी विशेष रूपान्तरणका लागि अभियान’ सञ्चालन गर्न लागेका हौं । महराका अनुसार अभियानको आगामी भदौ १६ गते उद्घाटन हुनेछ। अभियानमा जनताका घरघरमा जाने र जनताको गुनासो सुन्ने र पार्टीमा केन्द्रित गरिने छ । यही साउन १७ गतेदेखि शुरू भएको बैठकमा अध्यक्ष दाहालले समसामयिक राजनीतिक प्रस्ताव पेश गर्ने कार्यतालिका छ ।

बैठकले केन्द्रीय समितिलाई ४०९ सदस्यीय बनाएको छ । यस्तै केन्द्रीय समितिमा ३५ प्रतिशत महिलाको प्रतिनिधित्व सुनिश्चित गरिएको छ । बैठकमा ३८७ पूर्ण र १९६ वैकल्पिक केन्द्रीय सदस्य, अनुशासन, लेखा र निर्वाचन आयोगका सदस्य ४१ तथा सात भौगोलिक र तीन गैरभौगोलिक गरी १० प्रदेशका ९० पदाधिकारीको सहभागिता थियो।