अमेरिका

अनुमानित १.५८ बिलियन डलरको मेगा मिलियन्स ज्याकपट अमेरिकाको फ्लोरिडा राज्यका एक भाग्यशालीले जितेका छन् । ३२, १९, १३, ३३, २० नम्बर हुने बिजेताले उक्त रकम पाउने छन् । भने गोल्ड मेगाबल १४ रहेको छ । यति ठूलो रकम जित्ने टिकट ज्याक्सनभिल नजिकै उत्तरी फ्लोरिडाको नेप्च्युन बीचको सुपरमार्केटमा बेचिएको जनाइएको छ ।

मंगलबार खोलिएको मेगा मिलियन्स ज्याकपट इतिहासकै सबैभन्दा ठूलो रकमको थियो । करिव चार महिनादेखि मेगा मिलियन्स ज्याकपट कसैले पनि नजितेपछि रकम बढेर १.५८ बिलियन डलर पुगेको थियो ।

दोश्रो ठूलो मेगा मिलियन्स सन् २०१८ को अक्टोबर २३ मा खोलिएको थियो जुन १ दशमलव ५३ बिलियन डलरको थियो । उक्त मेगा मिलियन्स साउथ क्यारोलिनाका व्यक्तिले जितेका थिए ।

तेश्रो ठूलो मेगा मिलियन्स भने यसै बर्ष जनवरीको १३ मा खोलिएको थियो, जुन १ दशमलव ३४ बिलियनको थियो । गतबर्षको जुलाईमा १ दशमलव ३३ बिलियनको र सन् २०२१ को जनवरीमा १ बिलियनको मेगा मिलियन्स खोलिएको थियो ।

मेगा मिलियन चिठ्ठा अमेरिकाका ४४ वटा राज्यहरुमा खेल्न सकिन्छ । साथै वासिंटन डिसी र युएस भर्जिन आइल्याण्डमा पनि खेल्न सकिन्छ । मेगा मिलियन हरेक मंगलबार र शुक्रबार न्युयोर्क समय अनुसार राती ११ बजे खोलिन्छ । यसरी खेलिने टिकटको मूल्य २ डलर पर्दछ। खेल्ने व्यक्तिले १ देखि ७० भित्रका ५ वटा नम्बर र १ देखि २५ भित्रको एउटा नम्बर छनौट गर्नु पर्ने हुन्छ । या कम्पूटरले स्वत नम्बर छनौट गरेर दिन्छ, जसलाई क्विक पिक भनिन्छ ।