पोखरा, १६ फागुन । विद्यार्थी संगठनहरु चैत ५ गते हुने स्वतन्त्र विद्यार्थी युनियनको निर्वाचनका लागि केन्द्रीत बनेका छन् ।

निर्वाचन हुने निश्चित भएसँगै र कार्यतालिका सार्वजनिक भएसँगै विद्यार्थी संगठन निर्वाचन केन्द्रीत बनेर आफ्ना गतिविधिहरु संचालन गर्ने गरेका छन् ।

विद्यार्थीलाई आफ्नो पक्षमा आकर्षित गर्नदेखि संगठन विस्तार गर्ने विशेष योजनासहित विद्यार्थी संगठनहरु अघि बढेका छन् ।

निर्वाचनका लागि उम्मेद्वार बन्न चाहनेहरुले दौडधुर तिव्र पारेका छन् । विद्यार्थी संगठन र पार्टी भित्र समेत लाविङ गरिरहेका छन् ।

निर्वाचनका लागि फागुन १९ गते विद्यार्थी सङ्घ÷सङ्गठन दर्ता गर्नुपर्ने छ । फागुन २१ गते मतदाता सूची प्रकाशन र फागुन २७ गते समानुपातिक तथा प्रत्यक्षतर्फको उम्मेदवारी दर्ताका लागि समय दिइएको छ । मतदान चैत ५ गते बिहान ८ बजेदेखि दिउँसो ४ बजेसम्म सम्वन्धित क्याम्पसमा हुने छ ।

त्रिभुवन विश्वविद्यालयका ६२ आङ्गिक क्याम्पस र एक हजार ४० सम्वन्धन क्याम्पसमा निर्वाचन हुँदैछ ।
निर्वाचनको मिति नजिकिए सँगै त्रिभुवन विश्वविद्यालयले क्याम्पसहरुमा निर्वाचन समिति गठन गरेको छ । क्याम्पस प्रमुख संरक्षण रहने गरी समिति गठन गरिएको हो ।